©2018 by Vegan Heilsa. Proudly created with Wix.com

Search
  • Vegan heilsa

Indverskt Dal

Mæðgurnar Solla Eiríks og Hildur hafa um árabil deilt himneskum uppskriftum með lesendum sínum á vefsíðunni Mæðgurnar. Allar uppskriftir þeirra mæðgna er nú að finna á www.himneskt.is, ásamt fjöldan allan af öðrum frábærum uppskriftum. Sollu þarf vart að kynna enda frumkvöðull í grænmetis matargerð, en Hildur er dóttir hennar og hefur augljóslega erft hæfileika móður sinnar. Uppskriftirnar eru hver annarri betri. Fyrir þau ykkur sem eruð að byrja að prófa ykkur áfram þá mælum við sérstaklega uppskriftum Mæðgnanna, þær einfaldar, aðgengilegar en umfram allt ótrúlega gómsætar.


Þessi uppskrift af indversku dal er jafn góð og hún er einföld. Það rennur ljúflega ofan börn og fullorðna, grænkera, grænmetisætur og alla hina!



Hildur Ársælsdóttir

www.himneskt.is/maedgurnar

www.himneskt.is

@himneskt


Dal finnst mér fallegt orð. Það er upprunnið úr Sanskrit og er dregið af sögninni "að kljúfa". Dal er notað sem samheiti yfir alls kyns þurrkaðar baunir sem hafa verið klofnar í tvennt og er jafnframt notað yfir rétti sem eldaðir eru úr slíkum baununum.

Á Indlandi, í Pakistan, Nepal, Sri Lanka, Bangladesh og á þeim slóðum er dal mjög algengur hversdags matur. Útfærslurnar eru óteljandi, enda hugtakið nokkuð opið. Til eru heilu matreiðslubækurnar sem innihalda ekkert nema uppskriftir að dal, krydduðu á sinn hátt einkennandi fyrir hvert landsvæði fyrir sig. Við grænkerarnir hér á norðurslóðum leitum oft innblásturs í matarmenningu þjóða sem hafa lengri og sterkari hefð fyrir grænmetisfæði. Réttir úr baunum skipa þar stóran sess, enda eru baunir næringarrík, saðsöm og ódýr fæða. 

Ég borða mikið af baunum og linsum og finn að það gerir mér gott. Þær eru umhverfisvænn og hagkvæmur próteingjafi. Góður matur fyrir þarmaflóruna.

Landlæknisembættið mælir líka með aukinni neyslu á baunum og linsum: "Flestir Íslendingar hefðu heilsufarslegan ávinning af því að auka neyslu á fæðu úr jurtaríkinu, s.s. á grænmeti, ávöxtum, berjum, hnetum, baunum, linsum, fræjum og heilkornavörum. Aukin neysla á jurtaafurðum og minni neysla dýraafurða mun auk þess hjálpa til við að takmarka losun gróðurhúsalofttegunda og vernda þannig umhverfið". 


Ég vel lífrænt ræktaðar linsur og baunir þegar ég get, mér finnst baunir ekki dýrar miðað við næringarþéttni og er því alveg til í að splæsa í linsur úr lífrænni ræktun.

En þá er það uppskriftin mín

Dal er auðvitað hægt að elda úr hverskyns klofnum baunum/linsum. Uppáhaldið mitt eru rauðar linsur því þær eru svo fljótsoðnar, miðað við margar aðrar tegundir. 

Dal ber ég oftast fram með lífrænum basmati hrísgrjónum og raitu. Raita er einföld jógúrtsósa með hvítlauk og rifnum gúrkum. Mér finnst hrein vegan jógúrt mjög góð í raitu. Daginn eftir breyti ég síðan afgangnum í linsubaunasúpu, þá þynni ég dalið með vatni og set vel af sítrónu og engifersafa með. 

Mér finnst best að byrja á því að skella rótargrænmeti í ofninn og elda svo dalið. Á meðan dalið mallar sýð ég hrísgrjón og hræri í raitu og legg svo á borð. Ef ég geri þetta í þessari röð þá er allt tilbúið á svipuðum tíma. 



Fyrir 4

Rótargrænmeti

u.þ.b. 500g rótargrænmeti (sæt kartafla, kartöflur, rauðrófur eða gulrætur - veljið 1 eða fleiri)1 msk kókosolía½ tsk sjávarsalt½ dl vatn Hitið ofninn í 200°C. Skerið rótargrænmetið niður og veltið upp úr 1 msk kókosolíu. Saltið, hellið vatninu jafnt yfir og bakið svo í ofninum í u.þ.b. 30 mínútur. En fylgist með, það fer eftir stærð bitanna hversu lengi þarf að baka. Gott að velta grænmetinu með spaða allavega einu sinni. 

Dal

1 meðal stór laukur2 hvítlauksrif2 msk engiferskot (engifersafi)1 ½ msk Garam Masala eða gott Curry paste½- 1 tsk túrmerik⅛ tsk svartur pipar1 msk kókosolía1 lítið blómkálshöfuð eða ½ stórt, skorið í munnbita250g rauðar linsur, lífrænar (½ poki)1 dós kókosmjólk (400ml)400-500 ml vatn 1 ½ tsk sjávarsalt4 tsk sítrónusafiferskur kóríander, ef vill

Byrjið á að saxa niður lauk og hvítlauk, hitið í 2 mín í botni pottsins í olíunni, með engiferskoti, karrýblöndu, túrmerik og pipar. Þetta er gert til að opna bragðið af kryddunum. Bætið svo blómkálsbitunum út í, því næst linsunum ásamt kókosmjólkinni og vatninu. 

Látið suðuna koma upp og lækkið svo hitann þannig að allt malli í rólegheitum í u.þ.b. 20mín - eða þar til blómkálið er orðið mjúkt og linsurnar orðnar að smá kássu. Hrærið í af og til og fylgist með að brenni ekki í botninn. 

Á meðan dalið mallar í pottinum er tilvalið að sjóða hrísgrjón og hræra í raítu. Í lokin, þegar dalið er tilbúið, bætið þá saltinu og sítrónusafanum út í. Smakkið dalið, ef ykkur finnst það mega vera bragðmeira bætið við smá auka salti, sítrónusafa eða ólífuolíu.

Setjið ofnbakaða grænmetið út á dalið og stráið ferskum kóríander yfir ef þið eigið. Berið fram með basmati grjónum og raitu.

Raita

1 bolli hrein jógúrt (ég nota vegan jógúrt)⅓ agúrka, skorin í bita eða rifin með rifjárni1 hvítlauksrif, pressað

Blandið öllu saman í skál.

Njótið!
249 views